Patrick Laquechek eta Garazi Artolak irabazi zuten Lasarte-Oriako Mendi Lasterketa bigarren edizioa.
Lasarte-Oria Trail-ek antolatutako proba parte-hartze arrakasta handikoa izan zen, 223 korrikalarik parte hartu baitzuten, Juanluri ahalik eta omenaldirik onena eginez, klubeko kide garen guztiontzat bereziki hunkigarria izan zen edizio batean.
Goizeko lehen orduetatik, emozioz beteta zegoen Antonio Mercero espazioan dagoen irteera puntuko giroa. Toki ezberdinetatik etorritako
korrikalariek egun oskarbi baina freskoa aurkitu zuten, Buruntzako igoerari aurre egiteko aproposa.
Sailkapenak
14,5 kilometroko ibilbideak 780 metroko desnibel positiboa zuen, eta gogorra eta ikusgarria izan zen. Lehen igoeratik hiru korrikalarik markatu zuten erritmoa, eta berehala hasi zen buruz buruko talde bat
definitzen, eta hortik atera zen azken irabazlea.
Publikoak lasterketaz gozatu ahal izan zuen, tarte teknikoenetan eta
desnibel handieneko guneetan korrikalariak animatzeko aukera izan zuen, gune basotsuenarekin batera, parte hartzaileen erresistentzia fisiko eta mentala proban jarri zuena.
Gizonezkoetan, Patrick Laqueche izan zen irabazlea, irundarrak ordu 1
eta 11 minutu eta 37 segundoko denborarekin helmugaratzea lortu zuen. Bere nagusitasuna nabarmena izan zen lasterketaren erditik aurrera, non jarraitzaileengandik aldendu eta helmugaraino abantaila erosoa mantentzea lortu zuen.
Emakumezkoetan, Garazi Artola zumaiarrak irabazi zuen lasterketa, eta ordu 1 eta 29 minutu eta 59 segundo behar izan zituen lasterketa bukatzeko. Bere irmotasunari eta ibilbideko tarterik zailenetan erakutsitako indarrari esker, garaipena lortu zuen.
Probako errekorra hautsi ezinik geratu zen. Beraz, saria 2026ko
ediziorako metatzen da.
- Patrick Laqueche Saralegi (Irún), 1:11.37
- Josu Gálvez Calero (Eskoriatza), 1:12:40
- Xabat Alonso Flores (Hernani), 1:13:12
Ikusi sailkapen osoa
- Garazi Artola Balda (Zumaia), 1:29.59
- Libana Taboada Morán (Orio), 1:33:05
- Nerea Amilibia Arruti (Zarautz), 1:34:01
Ikusi sailkapen osoa
- Xavier Mujika Urruzola, 1:16:31
- Nerea Arteaga Martía, 1:46:46
Ikusi sailkapen osoa
- Xabier Aizpurua Intxausti (Zubieta), 1:19:24
- Rocío Calero (Donostia), 2:28:32
Ikusi sailkapen osoa
Juanluri omenaldia
Lasterketaz harago, ordea, Juanluren omenaldia izan zen egunaren benetako bihotza, uztailean entrenatzen ari zela utzi baitzigun. “Juanlu… beti gogoan” dioen pankarta handi bat izan zen nagusi egun osoan Okendo plazako oholtzan.
Proba hasi aurretik, une bereziki hunkigarria bizi izan zen, alabaren eta alargunaren omenezko aurreskua dantzatu baitzuten, irteerako arkupearen azpian eta korrikalarien, familiaren eta lagunen aurrean. Lore-sorta bat eta minutu bateko isilunea eman ondoren, txalo zaparrada bero batek hartu zuen lekukoa.
Lankide handia zen, lagun ona eta pertsona ona. Irribarre handi batekin eta umore onez gogoratzen dugu denok. Zauden tokian zaudela, Juanlu, nahi duzun bezala egin korrika; korrika libre egin, hemen ez zaitugu inoiz ahaztuko”, esan zuen Javier Olazagoitiak, klubeko presidenteordeak, hunkituta, irteera baino minutu batzuk lehenago.
2026an hurrengo edizioa
Mendi Lasterketa – Juanlu Oroimenezkoa ez da lasterketa bat bakarrik; mendi zale amorratu baten ondarea, natura eta bizitza ospatzeko ekitaldia da. Halaber, Lasarte-Oria Trailek Lasarte-Oriako bizitza soziala, kulturala, kiroletakoa eta ekonomikoa dinamizatzen lagundu du.
Kirol-esperientzia bat baino askoz gehiago eraman zuten 200 parte-hartzailek baino gehiagok; emozioz, adiskidetasunez eta errespetuz beteriko egunaren oroitzapena eraman zuten.
Hirugarren edizioa 2026an izango da, datorren urtean egingo den Mendi Festarekin txandakatzean. Lasarte-Oria Trailetik lanean jarraituko dugu lasterketa Gipuzkoako mendi lasterketen egutegian ekitaldi bakartzat finkatu dadin, beti ere Juanlu guztion bihotzean dugula.
Bigarren edizioaren balorazio “bikaina”
Lasarte-Oria trail Mendi Elkarteak igandean antolatutako bigarren mendi lasterketako antolakuntzaren eta garapenaren balorazio bikaina egiten du.
Kolaboratzaileen, babesleen, erakundeen eta boluntarioen aldetik jaso dugun laguntzari dagokionez, ezin dugu gehiago eskertu, erantzuna ikaragarria izan baita. Antolatzen ditugun ekintzetan lagundu eta parte hartu nahi duen jendea daukagu gure inguruan, eta horrek indar handia ematen digu aurrera jarraitzeko.
Juanluri omenaldia
Bestalde, joan den uztailean gure taldekide Juanluren heriotza tragikoa dela eta, atzoko ekitaldia berari egindako omenaldia izan zen. Juan Luis klubaren sortzaile izateaz gain, beti prest zegoen irteeretara edo antolatutako ekintzetara etortzeko eta baita lanean jarduteko ere.
Gure eta Lasarte-Oriako herri osoaren oroimenean bizirik mantentzeko modu bat da eta izango da. Lasterketa hasi aurreko omenaldia zinez hunkigarria izan zen, inoiz ez baita erraza horrelako tragediak berriro gogoratu behar izatea.
Korrikalarien iritzi positiboak
Egunari berari dagokionez, parte hartzaileen eta boluntarioen hainbat iritzi jaso ondoren, lasterketa aurretik, bitartean eta ondoren sortu zen giroa ikusgarria izan zela besterik ezin dugu esan. Laguntzen, korrika egiten, antolatzen edo besterik gabe lasterketa ikustera joandakoek bat egiten zuen antolaketa eta giroa hamarrekoak izan zirela.
Klubean sartzeko gonbidapena
Badakigu xehetasun batzuk hobetu zitezkeela, baina iritzi horiek jasotzeak eta dena hain ondo joateak indar handia ematen digu aurrera jarraitzeko eta etorkizun hurbilean jarduera gehiago antolatzeko. Azkenik, korrika egitea edo mendira joatea gustatzen zaion oro gure klubean parte hartzera gonbidatu nahi dugu.
Txintxarri eta Isaac Farreren bideo eta argazkiak